Rrjeti i Monitorimit Kundër Dhunës me Bazë Gjinore dënon gjuhën e përdorur nga politika

Pavarësisht se nuk ka nisur ende zyrtarisht fushata elektorale për zgjedhjet e 25 prillit, gjuha politike dhe sulmet personale ndaj kundërshtarëve janë ashpërsuar ndjeshëm.

Për këtë, Rrjeti i Monitorimit Kundër Dhunës me Bazë Gjinore me një thirrje publike ka kërkuar nga subjektet politike, që të ndalojnë urgjentisht sulmet verbale ndaj kandidateve gra në zgjedhje.

Ky institucion thotë se gjuha seksiste e përdorur nga politikanët për të sulmuar gratë është e papranueshme dhe e dëmshme për shoqërinë tonë.

“Të ndalohet urgjentisht dhuna verbale ndaj grave kandidate në zgjedhje! Rrjeti i monitorimit kundër dhunës me bazë gjinore vëren se, ende pa nisur mirë fushata zgjedhore ka filluar të ushtrohet një gjuhë seksiste dhe urrejtjeje ndaj kandidateve gra në zgjedhje”, thuhet në apel.

Në reagimin e tij publik në faqen zyrtare në “Facebook”, Rrjeti i Monitorimit Kundër Dhunës me Bazë Gjinore i ka përmendur subjektet politike në garë, Komisionin Qendror të Zgjedhjeve dhe Autoritetin e Mediave Audiovizive, që të tregohen më të kujdesshëm, të monitorojnë rastet dhe të dënojnë përdorimin e gjuhës seksiste.