Rrumbullaku: Arrestohen Julian Meçe dhe Plarent Dervishaj, erdhën nga Emiratet Arabe

Drejtori i përgjithshëm i Policisë së Shtetit doli këtë të mërkurë në një konferencë për mediat ku mes të tjerave tha se janë arrestuar 2 eksponentë kriminalë, Julian Meçe dhe Plarent Dervishaj.

Gjatë fjalës së tij, Rrumbullaku u shpreh se Jualian Meçe dhe Plarent Dervishaj janë sjellë nga Emiratet e Bashkuara Arabe në Shqipëri përmes aeroportit të Rinasit.

“Policia e Shtetit është partneri më i besueshëm sa i përket luftës kundër krimit të organizuar, organizatave kriminale në një bashkëpunim me SPAK dhe të gjithë prokuroritë. Në kuadrin e informacioneve dhe operacioneve të fshehta policore, Policia e Shtetit ka bërë të mundur arrestimin e 2 eksponentëve të krimit të organizuar në kuadrin e grupit të strukturuar kriminal dhe të organizatave kriminale, Plarent Dervishaj dhe Julian Meçe.

Mund të ju konfirmoj edhe një fakt tjetër për ekzekutimin e një vendimi, Fabio Ballabani, edhe ky pjesë e grupit të strukturuar kriminal, për të cilin bëhet ekzekutimi i vendimit në një vend partner, aktualisht vuan dënimin në një burg”.

I pyetur se kur do të bëhet ekstradimi i tyre Rrumbullaku u përgjigj:

“Ata janë nisur nga aeroporti i Rinasit për në dhomat e sigurisë së Drejtorisë së Policisë Tiranë. Kanë ardhur nga Emiratet e Bashkuara Arabe”.

Plarent Dervishaj, Julian Mecaj akuzohen si të përfshirë në atentatin ndaj ish-prokurorit Arjan Ndoj, ku mbeti i vrarë shoferi i tij, Andi Maloku.

I pyetur në lidhje me informacionet për lirimin e Durim Bamit nga burgu në Dubai, Rrumbullaku është shprehur se ka një ndryshim të masës së sigurisë, por jo lirim të tij.