Rubio: SHBA do të zbatojë bllokadën e naftës, nuk do të qeverisë Venezuelën

Sekretari i Shtetit i SHBA-së, Marco Rubio,  tha të dielën se Uashingtoni nuk do ta qeverisë Venezuelën, përveçse do të zbatojë bllokadën e naftës.

Deklarata e Rubios duket si një përpjekje për të zbutur shqetësimet se veprimi i vendosur i së shtunës për të arritur ndryshimin e regjimit në Venezuelë do ta zhytte vendin në një tjetër ndërhyrje të zgjatur të huaj ose në një përpjekje të dështuar për ndërtimin e kombit.

Fjalët e Rubios sinjalizojnë një ndryshim nga vërejtjet fillestare të bëra nga Presidenti i SHBA-së Donald Trump, në të cilat ai tha se Uashingtoni do ta “drejtonte” Venezuelën për një kohë të përkohshëm derisa të gjendet një zgjidhje demokratike afatgjatë për krizën.

Pretendimet e Trump se SHBA-të do ta “drejtonin” të paktën përkohësisht kombin e pasur me naftë sugjeronin një strukturë qeverisëse sipas së cilës Uashingtoni do të kishte fjalën e fundit mbi mënyrën se si do të qeveriset Venezuela.

Rubio ofroi një qasje më të nuancuar, duke thënë se SHBA-të do të vazhdonin të zbatonin një bllokadë nafte që ishte tashmë në fuqi në anijet cisterna të sanksionuara përpara se Maduro të rrëzohej nga pushteti dhe do ta përdornin këtë ndikim si një mjet për të nxitur ndryshimet e politikave në Venezuelë.

“Dhe kështu, ky është lloji i kontrollit që presidenti po tregon kur e thotë këtë”, tha Rubio në një intervistë.

“Ne vazhdojmë me atë bllokadë dhe presim të shohim ndryshime, jo vetëm në mënyrën se si drejtohet industria e naftës për të mirën e njerëzve, por edhe në mënyrë që ata të ndalojnë trafikun e drogës”, u shpreh ai.