Rusët zbarkojnë në Bjellorusi, Ukraina frikë për sulme

Bjellorusia ka mirëpritur kontingjentin e radhës të trupave ruse që kanë mbërritur për t’u stërvitur me ato vendase. Janë rreth 9 mijë ushtarët rusë që do të mblidhen në vendin fqinj për sesione të përbashkëta.

Lëvizja përforcon spekulimet e Perëndimit se Minsku dhe Moska mund të jenë duke përgatitur një sulm të ri ndaj Ukrainës.

Paralajmërimi në fjalë ka ngritur shqetësimin për një mobilizim të mundshëm ushtarak të qytetarëve bjellorusë, hipotezë që është hedhur poshtë nga krerët e ushtrisë vendase.

“Të gjitha informacionet e rreme të publikuara në faqe të ndryshme interneti nuk janë të besueshme. Nuk ka arsye për t’u shqetësuar. Qytetarët vetëm sa do të thirren në komisariat, do t’u regjistrohen të dhënat dhe më pas do të kthehen në rezidencat e tyre. Nuk ka mobilizim në Bjellorusi”, thotë Alexander Shalpuk, oficer i ushtrisë bjelloruse.

Për opozitën bjelloruse, do të ishte një gabim i rëndë për Minskun nëse do të ndiqte hapat e Kremlinit dhe shpallte mobilizimin.

“As qytetarët dhe as ushtria bjelloruse nuk e mbështesin këtë luftë. Nuk besoj se ushtarët bjellorusë do t’i përgjigjen thirrjes. Ata nuk janë të motivuar dhe në fakt nuk kanë pajisje”, u shpreh Sviatlana Tsikhanovskaya, lidere e opozitës bjelloruse.

Por Ukraina preferon të mos rrezikojë kur bëhet fjalë për sulme që mund të vijnë nga territori bjellorus. Për këtë arsye ajo ka përforcuar mbrojtjen përgjatë kufirit me forca speciale, për t’i bërë kontrast çdo operacioni që mund të vijë nga Moska dhe Minsku.

LEXONI GJITHASHTU

• Bjellorusia paralajmëron vendosjen e 9 mijë trupave ruse në kufi
• Lufta| Përgatitje të reja në kufi e ajër, trupat ruse drejt Bjellorusisë
• Lukashenko: Ukraina po përgatit sulm ndaj Bjellorusisë