Rusia: Do të dërgojmë marinën për të mbrojtur anijet nga pirateria perëndimore

Një zyrtar i lartë rus ka thënë se Moska mund të vendosë marinën e saj për të mbrojtur anijet e lidhura me Rusinë nga konfiskimet e mundshme evropiane. Nikolai Patrushev tha të martën se marina e vendit duhet të jetë gati për t’iu kundërvënë asaj që ai e përshkroi si “pirateri perëndimore”.

“Nëse kjo situatë nuk mund të zgjidhet në mënyrë paqësore, marina do të thyejë çdo bllokadë dhe do të veprojë për ta eliminuar atë. Dhe të mos harrojmë se shumë anije lundrojnë në det nën flamuj evropianë – edhe ne mund të interesohemi për atë që ato mbajnë dhe për ku po shkojnë”, i tha ai.

Patrushev shtoi se çdo përpjekje për të imponuar një bllokadë detare ndaj Rusisë do të ishte e paligjshme sipas ligjit ndërkombëtar, duke pretenduar se përdorimi i termit “flotë në hije” nga BE-ja nuk kishte bazë ligjore.

Termi flotë në hije i referohet rreth 1,500 anijeve cisternë të vjetra ose me rregulla të lehta që operojnë nën struktura pronësie të errëta për të ndihmuar Rusinë të eksportojë naftë të papërpunuar te blerës si Kina dhe India, duke anashkaluar sanksionet perëndimore.

Më shumë se 600 anije janë shënjestruar nga sanksionet nga BE, Mbretëria e Bashkuar dhe SHBA-ja. Këto masa kanë ndihmuar në uljen e të ardhurave ruse nga nafta.

Më herët këtë vit, marina franceze ndaloi shkurtimisht një anije cisternë që dyshohej se operonte brenda flotës në hije përpara se ta lejonte të vazhdonte udhëtimin e saj.

Në muajt e fundit, SHBA-të kanë ndërmarrë hapa për të ndaluar fizikisht dhe sekuestruar disa anije cisterna të lidhura me flota në hije që transportonin naftë të sanksionuar nga Rusia, Venezuela dhe Irani.