Rusia ofron shtetësi për banorët e Ukrainës në zonat e pushtuara

Presidenti Vladimir Putin nënshkroi të mërkurën një dekret që thjeshton procesin për banorët e rajoneve të Ukrainës Kherson dhe Zaporizhzhia, të pushtuara nga Rusia për të marrë nënshtetësinë dhe pasaportat ruse.

Dekreti shënon një hap të mëtejshëm drejt “rusifikimit” të dy rajoneve, ku lufta e Moskës në Ukrainë i ka mundësuar asaj të krijojë një urë tokësore të vazhdueshme që lidh Rusinë me gadishullin e Krimesë, raporton Reuters.

Me këtë lëvizje Putini zgjeron një skemë të disponueshme për banorët e zonave të kontrolluara si Donetsk dhe Luhansk, ku Moska ka lëshuar rreth 800,000 pasaporta që nga viti 2019.

Rusia pretendoi kontrollin e plotë të rajonit Kherson, në veri të Krimesë, në mes të marsit, dhe mban pjesë të rajonit të Zaporizhzhia në veri-lindje.

Në Kherson, guvernatori ukrainas është rrëzuar dhe administrata ushtarako-civile tha në fillim të këtij muaji se planifikonte t’i kërkonte Putinit ta inkorporonte atë në Rusi deri në fund të vitit 2022. Ukraina është zotuar të rimarrë të gjithë territorin e saj të pushtuar.

I pyetur për lëvizjen e shtetësisë, zëdhënësi i Departamentit të Shtetit të SHBA Ned Price tha se Uashingtoni do të “refuzonte me forcë” çdo lëvizje që ishte pjesë e përpjekjeve ruse për të imponuar vullnetin e saj në Ukrainë.

“Ne kemi parë forcat ruse të përpiqen përmes mënyrave të tjera për të nënshtruar popullin ukrainas në këto zona”, tha Price në një konferencë për shtyp.

LEXONI GJITHASHTU:

• ‘Ukraina të lëshojë territor’, Zelenski reagon ndaj ish-sekretarit amerikan