Rusia sulmon për herë të parë që selinë e qeverisë së Ukrainës

Ndërtesa kryesore qeveritare e Kievit është dëmtuar si pasojë e sulmeve të natës.

Në Facebook, kryeministrja e Ukrainës, Yulia Svyrydenko, shkruan se “për herë të parë, ndërtesa e Qeverisë, çatia dhe katet e sipërme janë dëmtuar për shkak të një sulmi armik. Ekipet e shpëtimit po e shuajnë zjarrin”.

Kryetari i bashkisë së Kievit, Vitaliy Klitschko, thotë se ndërtesa qeveritare u përfshi nga flakët si pasojë e “një sulmi të dyshuar me dron”.

Ndërtesa ndodhet në lagjen qendrore Pecherskyi, shkruan Klitschko në një postim në Telegram. Ai thotë se zjarrfikësit janë ende duke punuar në vendngjarje.

Diku tjetër në kryeqytet, u goditën një depo, një ndërtesë banimi 16-katëshe dhe një ndërtesë katër-katëshe.

Forcat ajrore ukrainase raportojnë se një numër rekord dronësh dhe raketash u lëshuan nga Rusia në sulmin e fundit të natës – më shumë se 800 në total.

Sipas forcave ajrore, nëntë raketa dhe 56 dronë goditën 37 vende, dhe rrënojat e rrëzuara ranë në tetë vende.

LEXONI GJITHASHTU:

• Rutte për vendosjen e trupave të NATO-s në Ukrainë: Nuk na intereson ç’mendon Rusia
• Rusia sulmoi gjatë natës, Zelensky i bën thirrje botës të ndëshkojë agresionin