Sa do i kushtonte BE-së zgjerimi me 9 vende të reja anëtare

Pranimi i Ukrainës në BE do t’i jepte Kievit të drejtën për rreth 186 miliardë euro gjatë shtatë viteve, sipas vlerësimeve të brendshme të buxhetit të përbashkët të unionit, duke i kthyer “shumë” shtete anëtare ekzistuese në pagues neto për herë të parë.

Modelimi, i pari që doli nga Brukseli për pranimin e mundshëm të nëntë shteteve të reja anëtare, nënvizon implikimet e thella politike dhe financiare të zgjerimit të Unionit në të gjithë kontinentin.

Zyrtarët e BE-së këtë verë vlerësuan pasojat e mundshme financiare në një studim të parë nga Financial Times, i cili përdori rregullat ekzistuese për buxhetin e unionit në periudhën 2021-2027. Këto u zbatuan për një bashkim europian të zgjeruar duke përfshirë Ukrainën, Moldavinë, Gjeorgjinë dhe gjashtë shtetet e Ballkanit Perëndimor.

Raporti vlerëson se shuma financiare e shtimit të të nëntë anëtarëve në buxhetin ekzistues, i njohur si korniza financiare shumëvjeçare, do të ishte 256.8 miliardë euro. Efektet e para për shtetet anëtare ekzistuese të BE do të përfshinin një shkurtim të subvencioneve të fermave me rreth një të pestën.

Megjithëse zgjerimi i plotë mund të zgjasë një dekadë ose më shumë dhe do të detyronte reforma të mëdha në aranzhimet ekzistuese buxhetore, shkalla e vlerësuar e ndryshimit të kërkuar do të kthente në mënyrë vendimtare balancën financiare brenda bllokut.

“Të gjitha shtetet anëtare do të duhet të paguajnë më shumë dhe të marrin më pak nga buxheti i BE-së; shumë shtete anëtare që aktualisht janë marrës neto do të bëhen kontribues neto,” përfundon dokumenti i sekretariatit të këshillit të BE-së.

Udhëheqësit e BE-së do të takohen në Spanjë të premten për diskutimet e tyre të para të detajuara si grup mbi zgjerimin dhe mënyrat se si do të ndryshonte bashkimi.

Dokumenti përshkruan mundësitë për BE-në nga zgjerimi, duke përfshirë forcimin e ndikimit gjeopolitik të BE-së, rritjen e madhësisë së tregut të brendshëm të bllokut me 66 milion njerëz në 517 milion, dhe adresimin e mungesës së fuqisë punëtore.

LEXONI GJITHASHTU:

• A është zgjerimi i BE realist? Analistët: Unioni duhet të reformohet
• Si fitohet lufta ndaj duhanit? Bëni kompanitë të paguajnë dhe më shumë