Gjatë hapjes së samitit të Procesit të Berlinit, kancelari gjerman Olaf Scholz vlerësoi përparimin e shteteve të Ballkanit Perëndimor në bashkëpunimin rajonal, duke veçuar kontributin e Kosovës për arritjet e saj të fundit në Marrëveshjen e Tregtisë së Lirë të Evropës Qendrore (CEFTA). Scholz theksoi se diplomacia e Kosovës në këtë kuadër përfaqëson një hap të madh për bashkëpunimin rajonal.

Procesi i Berlinit, themeluar një dekadë më parë, ka për synim mbështetjen e vendeve të Ballkanit Perëndimor në rrugën e tyre drejt Bashkimit Evropian dhe nxitjen e bashkëpunimit rajonal. Kancelari njoftoi nënshkrimin e dy dokumenteve të rëndësishme që do të lehtësojnë jetën e përditshme të qytetarëve të rajonit, duke përfshirë një plan të ri veprimi për tregun e përbashkët rajonal dhe një marrëveshje për të zgjeruar mundësitë e studimit dhe mobilitetin e studentëve.

Scholz gjithashtu iu referua tensioneve midis Serbisë dhe Kosovës, duke i bërë thirrje të dy vendeve që të fokusohen në të ardhmen evropiane dhe të zgjidhin çështjet përmes dialogut. Ai theksoi se zbatimi i plotë i marrëveshjeve ekzistuese është thelbësor për integrimin në BE dhe ripërsëriti mbështetjen e tij të plotë për procesin e normalizimit.

Në përfundim të fjalimit, kancelari Scholz nënvizoi rëndësinë e Procesit të Berlinit si një platformë për zgjidhjen e konflikteve dypalëshe dhe për nxitjen e paqes dhe bashkëpunimit në Ballkanin Perëndimor, duke theksuar se do të vazhdojë të mbështesë këto vende në rrugën e tyre drejt integrimit evropian.

LEXONI GJITHASHTU:

• Liderët e rajonit sot në Berlin, i pranishëm edhe kryeministri Rama
• “Kosova rrezikoi përjashtimin nga Procesi i Berlinit”, Gazetari: Ku gaboi qeveria