Sanae Takaichi thyen tabunë, parlamenti i Japonisë voton kryeministren e parë femër

Parlamenti i Japonisë ka votuar për kryeministren e parë femër në histori të vendit pasi kryeministri aktual, Shigeru Ishiba, i partisë së zonjës Takaichi, njoftoi dorëheqjen e tij muajin e kaluar.

Sanae Takaichi fitoi 237 vota në dhomën e poshtme të parlamentit me 465 vende dhe pritet gjithashtu të sigurojë shumicën në dhomën e sipërme më pak të fuqishme duke mposhtur udhëheqësin e opozitës, Yoshihiko Noda, të Partisë Kushtetuese Demokratike, i cili mori 149 vota.

Votat e së martës erdhën pasi partia e saj, Liberal Demokratike, ra dakord dje për një koalicion me Partinë e Inovacionit të Japonisë të krahut të djathtë.

Zgjedhja e znj. Takaichi shënon shkatërrimin e një “tavani prej qelqi” për Japoninë, ajo shënon gjithashtu një kthesë të mprehtë djathtas.

Ajo është një figurë konservatore e vendosur, që citon Margaret Thatcher si frymëzim, dhe vjen në pushtet në një kohë kur vendi është gjithnjë e më i shqetësuar për koston e jetesës dhe imigracionin.

Japonia po përballet aktualisht me rritjen e çmimeve, që kanë shkaktuar zemërim publik, duke nxitur mbështetjen për grupet e opozitës, përfshirë partinë e ekstremit të djathtë Sanseito.

Një gjë për t’u mbajtur mend është se kjo nuk ishte një votë popullore. Në thelb, kjo është zgjedhja e një udhëheqësi nga radhët e politikanëve.

Sanae Takaichi do të ketë një detyrë të madhe përpara saj — të rindërtojë besimin e publikut në Partinë e saj Liberale Demokratike (LDP).

Në një vend ku kaq shumë kryeministra dhe ligjvënës janë bij, nipër apo edhe stërnipër të politikanëve, ekziston një nivel i caktuar respekti për përpjekjen e saj për t’u ngjitur në shkallët politike pa pasur një lidhje familjare.

Dihet mirë se prindërit e Takaichi-t nuk donin ta dërgonin atë në universitet sepse ishte vajzë — dhe se Takaichi e re duhej t’i paguante vetë tarifat e shkollimit.

Ajo gjithashtu ka folur hapur për vështirësitë e saj për të pasur fëmijë biologjikë, por ka ndihmuar në rritjen e tre fëmijëve nga martesa e mëparshme e bashkëshortit të saj.

Sfida e saj më e fundit ka qenë kujdesi për bashkëshortin e saj, i cili kohët e fundit pësoi një goditje në tru.

Ato përvoja personale kanë formësuar dhe me siguri do të formësojnë politikat e saj.

Megjithatë, shumë janë ende të zemëruar për skandalin e mbledhjes së fondeve që ka implikuar anëtarë të lartë të partisë.

Ata janë gjithashtu të zemëruar se si LDP nuk ka bërë mjaftueshëm për t’i mbajtur njerëzit përgjegjës — ndërsa ata vazhdojnë të vuajnë financiarisht.

LEXONI GJITHASHTU:

• Kryeministri japonez dorëhiqet për të ruajtur unitetin e partisë
• Japonia regjistron numër rekord 100-vjeçarësh