“Sapo hape Kutinë e Pandorës”-Zv.ministri: Pse duam ta sjellim Formula 1 në Shqipëri

Zëvendës ministri i Ekonomisë, Kulturës dhe Inovacionit, Sokol Duma, është shprehur se Formula 1 kudo që shkon kthehet në një motor për ekonominë e vendit.

Komentet Duma i bëri në emisionin “Now me Erla Mëhillin” në Euronews Albania, ku tha se ajo kthehet në një motor zhvillimi jo vetëm për turizmin e drejtpërdrejtë që sjell, por bën edhe që vendi të shfaqet në hartën globale.

Ai tha se Shqipëria do të përpiqet që Formula 1 të organizohet në vendin tonë, megjithëse sipas tij, konkurrenca është e madhe.

“Sapo hape kutinë e pandorës. Kostot direkte dhe indirekte të lidhura me industrinë që është Formula 1 janë të pamatshme. Është bërë një studim që kërkon të llogarisë paratë që lëvizin për shkak të Formula 1. Unë personalisht e marr me rezerva të mëdha. Kudo që shkon Formula 1 kjo kthehet në një motor për ekonominë e vendit.

Jo vetëm për shkak të turizmit të drejtpërdrejtë që sjell eventi i Formula 1 në një fundjavë, apo në një javë apo dy javë përpara dhe pas organizimit, por sepse vendi shfaqet befas në hartën globale. Këtu mund të përfshijmë edhe pjesën e turizmit industrial, kryesisht sektori automotiv, hapen shumë dyer për zhvillimin e këtij sektori”, tha Duma.