Kancelari gjerman Olaf Scholz u tha votuesve se do të jenë ata që do të vendosin rezultatin e zgjedhjeve të 23 shkurtit në Gjermani dhe jo pronarët e rrjeteve sociale, duke iu referuar kështu komenteve të padronit të rrjetit “X”, Elon Musk.
Publikisht, Musk shprehu mbështetjen për partinë ekstremiste gjermane Alternativa për Gjermaninë, AfD, së pari në platformën e tij dhe më pas për gazetën gjermane “Welt am Sonntag”.
“Në përgjithësi, dikush mund të mendojë se sa më ekstrem është opinioni i tij, aq më shumë vëmendje merr. Por nuk është personi që bërtet më shumë ai që vendos se si do të vijojnë gjërat në Gjermani. Është shumica e njerëzve të arsyeshëm të vendit”, deklaroi Scholz.
Edhe pse nuk u përmend nga kancelari, miliarderi Musk, themelues i kompanisë “Tesla” dhe person i afërt me presidentin e zgjedhur Donald Trump, ka shkaktuar zhurmë në Gjermani duke mbështetur AfD-në.
Musk ka insistuar se mbështet politikat ekonomike të kësaj partie dhe ka insistuar se ajo nuk duhet të etiketohet si subjekt i së “djathtës ekstreme”.
Ditën e hënë, një zëdhënës i qeverisë gjermane deklaroi se komentet e Musk tregojnë se ai po përpiqet të influencojë zgjedhjet e ardhshme dhe se po inkurajojë votuesit të hedhin votën në favor të një partie e klasifikuar si “organizatë e dyshuar terroriste”.
Politikanë të shumtë reaguan ndaj qëndrimit të miliarderit amerikan, duke e krahasuar atë me presidentin rus Vladimir Putin, i cili sipas tyre kërkon të ndërhyjë në zgjedhjet gjermane.
LEXONI GJITHASHTU:
- Dy të paraburgosur për vjedhje arratisen nga komisariati, kapet njëri
- Shqiptari nga Kroacia: Rama “kapadai” në Kosovë, tregoi muskujt si vëlla i madh
