‘S’dyshohen bashkëpunëtorë të tjerë’, flet avokati i pastrueses që vodhi mijëra euro

Artan Gjermeni, avokati i Rozeta dhe Havier Dobi thotë se vjedhja e mijëra eurove në banesën e zyrtares Alda Klosi është kryer në bashkëpunim nga nënë e bir.

Në një intervistë ekskluzive për Euronews Albania, Gjermeni u shpreh se nuk ka dyshime për bashkëpunëtorë të tjerë në grabitjen spektakolare.

“Nuk ka  akuzë për grabitjen por për vjedhje. Deri në këtë fazë dyshimin më i arsyeshëm i konstatuar  nga gjykata është për bashkëpunimin e nënë e bir për vjedhjen e kësaj pasurie. Deri sot nuk kemi definicionin që të konstatojë hapësirën në kohë dhe hapësirë. Dyshimi i arsyeshëm është për vjedhje në  një rast, për banesën e zyrtares Alda Klosi”,  tha avokati.

Nënë e bir, Rozeta Dobi dhe Havier Dobi janë lënë sot në burg, pasi akuzohen për vjedhjen e mijëra eurove, dollarëve si dhe një sasie aksesorësh floriri në banesën e ish-zyrtares së lartë, Alda Klosi.

Nënë e bir nuk kanë dhënë asnjë deklaratë para gjyqtarit Arben Micku që udhëhoqi dhe seancën gjyqësore.

Prokurorja e çështjes Mirela Zavalani i ka akuzuar nënë e bir vetëm për vlerën 120 mijë euro të gjetura në shtëpinë e Klosit e jo për paratë që janë gjetur në shtëpinë e Rozeta dhe Havier Dobit.