Seanca në Apel për dosjen ‘Babale’, i pranishëm Salianji dhe deputetë të tjerë të PD

Në Gjykatën e Apelit të Juridiksionit të Përgjithshëm në Tiranë zhvillohet seanca e radhës për dosjen “Babale”.

I pranishëm në këtë seancë është edhe deputeti Ervin Salianji. Po ashtu në mbështetje të tij janë edhe deputetë e eksponentë të tjerë të Partisë Demokratike, si Ferdinad Xhaferi, Emilja Koliqi, Saimir Korreshi, Elda Hoti, Agron Gjekmarkaj, Lefter Gështenja, Bledian Nallbati, Dhurata Çupi, Luan Baçi, Gazmend Bardhi, Luçiano Boçi, Ludovik Hasani, Kastrioti Piroli, Asllan Dogjani dhe Dashnor Sula.

Kujtojmë se disa vite më parë, Salianji nisi një seri denoncimesh ndaj vëllait të ish-ministrit të Brendshëm, Fatmir Xhafajt, i cili rezultoi i dënuar me 7 vite në Itali dhe prej disa vitesh jetonte i lirë në Shqipëri.

Gjatë asaj kohe, gazetari investigativ Jetmir Olldashi publikoi një tjetër video ku i ashtu quajturi “Babale” u paraqit si drejtues i skafit të vëllait të ish-ministrit të Brëndshëm.

Pas publikimit të këtij rasti u hap një hetim penal me kallëzimin e Agron Xhafajt, vëllait të Fatmirit ku Salianji akuzohet për ‘shpifje’.

Në Gjykatën e Shkallës së Parë Salianji u dënua për këtë vepër penale me 1 vit burg, dënim të cilin ai e ka quajtur tërësisht politik.

LEXONI GJITHASHTU:

• Dosja “Babale”, shtyhet sërish gjyqi ndaj Ervin Salianjit
• Apeli pranon kërkesën e Salianjit për përjashtimin e Relatores së çështjes “Babale”