Serbët bojkotojnë referendumin, largohen nga zgjedhjet e 21 prillit në Kosovë

Pas deklaratave për bojkot të referendumit në Veri, Lista Serbe ka tërhequr ditën e sotme anëtarët e saj në komisionet e zgjedhjeve.

Diplomatët e SHBA dhe vendeve të BE në Prishtinë e cilësojnë vendimin si të gabuar.

Vendimi për tërheqjen nga zgjedhjet në katër komunat në veri të Kosovës, të Listës Serbe, është cilësuar si një vendim i pamatur nga Komisioni Qëndror i Zgjedhjeve në Kosovë.

Bojkotimi i zgjedhjeve të 21 Prillit, nga Lista Serbe, partia më e madhe e serbëve në Kosovë, është komentuar gjërësisht në media. Ka qënë kryetari i Listës Serbe që ka komentuar largimin duke u shprehur se janë vendosur “procedura të parealizueshme” për votimin e 21 prillit, se listat e votuesve “nuk e pasqyrojnë gjendjen reale në terren” dhe se numri i shqiptarëve në listat e votuesve “është rritur”.

Ndërkohë Komisioni Qëndror i Zgjedhjeve i Kosovës vendosi që votimi të mbahet më 21 prill, pasi i verifikoi nënshkrimet e qytetarëve në peticionet për shkarkimin e kryetarëve të komunave me shumicë serbe në veri të Kosovës, Mitrovicë e Veriut, Leposaviç, Zveçan dhe Zubin Potok.

Kryetarët shqiptarë u zgjodhën në prill të vitit 2023 në zgjedhjet të cilat u bojkotuan nga serbët në shenjë pakënaqësie me politikat e Qeverisë së Kosovës.

Nisja e detyrës së tyre nxiti tensione në fund të majit të vitit të kaluar, të cilat kulmuan në Zveçan, pasi protestuesit serbë u përleshën me pjesëtarët e misionit paqeruajtës të NATO-s në Kosovë, KFOR.

LEXONI GJITHASHTU:

• BE paralajmëron Kosovën e Serbinë, Stano: Po s’zbatuan marrëveshjen, do kenë pasoja
• Kosovë| 8 pretendues për kadetë përjashtohen pasi dolën pozitivë në testin e drogës