Serbët tubim në veri, Rakiç: Të formohet Asosacioni dhe të hiqet vendimi për targat

Serbët kanë mbajtur një tubim këtë të diel në veri të Mitrovicës, ku kanë kënduar këngë nacionaliste dhe himnin e Serbisë.

Kryetari i Listës Serbe, Goran Rakiç deklaroi se serbët përmes dorëheqjeve nga institucionet e Kosovës, janë duke mbrojtur marrëveshjen e Brukselit.

Sipas tij, serbët nuk duan të kërcënojnë askënd, por duan vetëm të përmbushen të gjitha marrëveshjet e Brukselit, duke përfshirë formimin e Asociacionit, si dhe tërheqjen e vendimeve, siç i quajti ai, të njëanshme për targat.

“Me dorëheqjet tona ne jemi duke mbrojtur marrëveshjen e Brukselit dhe të drejtën ndërkombëtare. Kujtojeni faktin se Albin Kurti, Vjosa Osmani dhe liderët e tjerë nga Prishtina shumë herë kanë përsëritur se për ta, nuk ekziston marrëveshja e Brukselit dhe se kurrë nuk do të bëhet Asociacioni i komunave serbe.

Dua të shfrytëzoj rastin të theksoj në veçanti se ne dëshirojmë paqe dhe vetëm paqe. Ne nuk duam ta kërcënojmë askënd, përveç se dëshirojmë që të zbatohen marrëveshjet e arritura dhe të formohet Asociacioni dhe të përmbushen të gjitha marrëveshjet e Brukselit. Natyrisht të tërhiqen të gjitha vendimet e njëanshme si ai përket targave”, theksoi ai.

LEXONI GJITHASHTU

• Kurti: Përpjekjet e Beogradit për destabilizimin e Kosovës do të dështojnë
• Zyrtari i NATO-s: KFOR i gatshëm të ndërhyjë nëse rrezikohet stabiliteti
• Postera ku shkruhet ‘Putini në Kosovë’ shfaqen në Mitrovicën e Veriut