“Serbia refuzoi BE-në”, Kurti: Nuk pranuan vetëmenaxhimin që u ofrua

Kryeministri i Kosovës, Albin Kurti, ka zbuluar përmes një deklarate për media çfarë ndodhi në takimin e të enjtes në Bruksel, të mbajtur në kuadër të normalizimit të marrëdhënieve mes Kosovës dhe Serbisë.

Kurti pohoi se ishte pala serbe ajo e cila refuzoi vetëmenaxhimin e ofruar nga Bashkimi Europian.

Duke iu rikthyer situatës në Veri, Kurti kujtoi se bojkoti i Listës Serbe për t’u ulur në parlamentin e Kosovës, fillimisht dëmton komunitetin serb atje, e më pas dhe shtetin e Kosovës.

“Nënshkrimi do të nënkuptonte pranim e për rrjedhojë edhe zbatim, mirëpo pranimi do të thotë nënshkrim e vetëm nënshkrimi do të thotë pranim e garanci për zbatim. Këtë ua kemi thën shumë qartë dje duke theksuar se Samiti i Këshillit Europian në Bruksel është ngjarja dhe vendi ku do të duhej të ndodhte këtë. Serbia refuzoi sërish nënshkrimin, duke refuzuar kështu dhe draftin për vetëmenaxhim apo zbatimin e nenit 7 të marrëveshjes në lidhje me nenin 10 të marrëveshjes bazike. Qytetarët e Kosovës nga komuniteti serb kanë të drejta të garantuara dhe të zgjeruara me Kushtetutën e Republikës tonë. Gjuha serbe është gjuhë zyrtare gjithandej Kosovës, në të gjitha nivelet e administratës. 17% të përfaqësuesve lokale në kuvendet komunale janë serbë, ndërkaq 10 vende janë ulëse të rezervuara për komunitetin serb në Parlamentin e Republikës së Kosovës të cilat po bojkotohen dhe nuk po shfrytëzohen. Ne e dimë që deputetët e shfrytëzojnë vullnetin e lirë që ndonjëherë bëjnë dhe bojkot përkohësisht për ndonjë çështje, mirëpo ta bësh bojkotin tërë kohën, nga pozita e ulëses së rezervuar ky është një dëm që i bëhet komunitetit serb së pari e më pas shtohet përpjekja për ta dëmtuar shtetin e Kosovës,” – u shpreh Kurti.

LEXONI GJITHASHTU:

• Gazetari: Ju tregoj propozimin që do pranojë Kurti për Asociacionin
• Takimi në Bruksel, Kurti: Ne e pranuam marrëveshjen, Vuçiç nuk firmos