“Serbia të ballafaqohet me të kaluarën”, paralajmërimi i Albin Kurtit

“Serbia duhet të ballafaqohet me të kaluarën e saj”. Kështu tha kryeministri i Kosovës, Albin Kurti, teksa bëri homazhe pranë pllakës përkujtimore, në nder të 40 të vrarëve nga forcat serbe, në lagjen “Dardania” në Pejë.

Bashkë më Kurtin ishin edhe zyrtarë të Lëvizjes Vetëvendosje.

“Bashkë me kolegë nga Kuvendi dhe me aktivistë të Lëvizjes sonë bëmë homazhe këtu në Pejë te lapidari, duke u përkulur e duke i përkujtuar 40 të vrarët gjatë luftës së fundit nga forcat serbe këtu në lagjen ‘Dardania’”, ka thënë Kurti, teksa ka thënë se Serbia duhet të ballafaqohet me të kaluarën e saj kriminale.

Kryeministri Kurti ka kërkuar më shumë punë nga Prokuroria Speciale në identifikimin e atyre që kanë bërë masakra në Kosovë.

“Drejtësia dhe e vërteta janë të domosdoshme për paqe afatgjate dhe për siguri, për të gjithë dhe për marrëdhënie të mira fqinjësore e normale. Serbia duhet të ballafaqohet me të kaluarën e saj kriminale në Kosovë dhe Prokuroria Speciale duhet të punojë ditë e natë që t’i nxjerrë para drejtësisë përgjegjësit dhe në këtë mënyrë të fillojë rehabilitimi për viktimat. Dihet që viktimat nuk janë vetëm të vrarët e të rrëmbyerit por edhe familjet e tyre, farefisi i tyre dhe mbarë shoqëria jonë”, ka deklaruar Kurti

LEXONI GJITHASHTU:

• “Kurti mik i posaçëm, Vuçiç vëllai nga Beogradi!” Analisti: Rama shkon më mirë me…
• Meta takon Kurtin: Mbështes qëndrimet e Prishtinës në procesin e dialogut me Serbinë