Serbia ul gatishmërinë në kufi, Vuçiç: Jemi gati në çdo rast

Presidenti i Serbisë, Aleksandër Vuçiç deklaroi mbrëmjen e djeshme se Forcat e Armatosura serbe kanë kaluar në një nivel më të ulët të gatishmërisë ushtarake për shkak të situatës së krijuar në Kosovë.

“Nga gjendja e gatishmërisë më të lartë kemi kaluar në një shkallë më të ulët të gatishmërisë për luftë. Por ende kemi një numër të rëndësishëm të forcave dhe mjaftueshëm që të ndihmojmë popullin tonë, këtë duhet ta dinë njerëzit”, ka thënë Vuçiç në një intervistë për median serbe.

Serbia i vuri forcat e saj të armatosura në gatishmërinë më të lartë luftarake pas dhunës që shpërtheu në veri të Kosovës në maj, pasi kryetarët shqiptarë u futën në disa ndërtesa komunale me shumicë serbe.

Popullata lokale serbe në veri të Kosovës bojkotoi zgjedhjet e prillit në të cilat u zgjodhën ata kryetarë komunash.

Bashkimi Evropian dhe Shtetet e Bashkuara të Amerikës i kanë bërë thirrje Prishtinës që të organizojë zgjedhje të reja në zonën me shumicë serbe për të qetësuar tensionet dhe që Serbia të braktisë gatishmërinë luftarake dhe të largojë trupat nga kufiri me Kosovën.

LEXONI GJITHASHTU:

• Aleksandër Vuçiç takohet me përfaqësuesit e Listës Serbe
• Somelierja: Vuçiç pëlqen verërat shqiptare, Kurti s’duhet të bëjë politikë me verën