Sezoni i verës sjell shtim të rasteve të infeksioneve të syrit, mjekët apelojnë për kujdes

Me rritjen e temperaturave në ditët e para të qershorit, mjekët okulistë po raportojnë një shtim të rasteve të infeksioneve bakteriale të syrit.

Sipas specialistëve, këto infeksione janë shumë ngjitëse dhe mund të prekin të gjitha moshat, ndërsa nëse nuk trajtohen në kohë, mund të sjellin edhe komplikacione që ndikojnë në shikim.

Oftalmologia pranë Poliklinikës së Specialiteteve nr. 3 në Tiranë, Suzana Zhuka, thekson se periudha e verës dhe frekuentimi i pishinave rrisin rrezikun e përhapjes së këtyre infeksioneve, për shkak të kontaktit më të lehtë dhe higjienës së pamjaftueshme.

Ajo apelon që qytetarët të tregojnë kujdes dhe të mos neglizhojnë simptomat e para, duke kërkuar ndihmë mjekësore menjëherë sapo shfaqen shenjat e infeksionit.

Sipas saj, në rastet kur kapen në fazë të hershme, infeksionet e syrit trajtohen me mjekim lokal dhe kalojnë brenda rreth 10 ditësh, por vonesa në trajtim mund të përkeqësojë gjendjen.

Mjekët këshillojnë qytetarët të ruajnë higjienën personale, veçanërisht gjatë sezonit të verës dhe përdorimit të pishinave, për të shmangur përhapjen e infeksioneve dhe komplikacionet e mundshme në shikim.