Sezoni turistik në Durrës, operatorët: Sezon i suksesshëm me problematika të vjetra

Durrësi, i cilësuar shpeshherë si kryeqyteti i turizmit në vend, po nis një sezon veror, që duket se do të jetë i suksesshëm.

“Rezervimet fillojnë që në maj, rreth javës së dytë të majit, ku spikat tregu spanjoll dhe baltik, që janë risi dhe vazhdon me polakët, siç ka qenë gjithmonë, por dhe gjermanët pas sezonit të verës”, thotw Aleksandër Granolli, operator turistik.

Shtrirja e sezonit nga maji deri në fund të tetorit rezultoi shumë I suksesshme vitin e kaluar, kur Durrësi regjistroi rreth 1.5 milionë turistë. Prandaj këtë vit sezoni i rërës dhe diellit pritet të zgjasë më tepër se vetëm 3 muajt karakteristikë veror.

“Pra, shtrirja është më e madhe këtë vit duke zënë fundin e majit, qershorin, korrikun, gushtin, shtatorin, por dhe tetorin me nordikët që janë më ‘in’ këtë vit”, shprehet ai.

Me gjithë punën e bërë, ky sezon i ri veror pritet të vijë me probleme të vjetra.

“Problematikat mbeten të njëjtat, ku mund të fokusohemi kryesisht tek mungesa e theksuar e burimeve njerëzore të specializuara, por edhe të thjeshta, paqëndrueshmëria e valutës, forcimi i herë pas hershëm i lekut në raport me euron dhe dollarin”, thekson Artan Luku, kryetar i DHTI Durrës.

Në raportin e vitit të shkuar, Durrësi rezulton ndër të vetmet qytete turistike në vend, që ka një raport të drejtë çmim-shërbim.  Një arritje që synon ta mbajë edhe këtë vit, qyteti që turizmin e ka motor të ekonomisë.