Sezoni veror gjallëron Gjirokastrën, suveniret tradicionale bëhen atraksion për turistët

Sezoni veror po sjell një fluks të lartë vizitorësh në Gjirokastër, duke rritur interesin për produktet artizanale dhe punimet tradicionale. Suveniret e realizuara me mjeshtëri nga artizanët vendas dhe ata nga trevat shqiptare janë kthyer në ndër produktet më të kërkuara nga turistët, të cilët i marrin si kujtim nga vizita në qytetin e gurtë.

“Është një ndjesi shumë e bukur pjesëmarrja në këtë panair. Është hera e parë që vij në Gjirokastër. Kam marrë pjesë edhe herë të tjera në panaire së bashku me gjyshen time. Këto aktivitete e mbajnë gjallë turizmin dhe promovojnë punimet artizanale, të cilat të rinjtë po i harrojnë gjithnjë e më shumë”, thotë një artizane.

Edhe më domethënëse bëhen këto aktivitete për faktin se bashkojnë artizanë nga Shqipëria, Kosova dhe treva të tjera shqiptare, të cilët ekspozojnë punimet dhe traditat e tyre.

“Vij nga Kosova dhe është hera e pestë që marr pjesë. Punimet e mia janë çanta të punuara me dorë, aksesorë dhe punime me rruaza. Aktivitetet e tilla janë shumë të rëndësishme, sepse ne artizanët kemi nevojë për mbështetje. Sa herë që marrim ftesa nga Shqipëria, i pranojmë me kënaqësi”, thotë një artizane nga Kosova.

“Pjesë e këtyre aktiviteteve janë artizanë nga zona të ndryshme të Shqipërisë dhe Kosovës, të cilët promovojnë trashëgiminë dhe vlerat e punimeve të tyre artizanale”, thotë një nga pjesëmarrëset.

Gjatë këtij viti, Gjirokastra ka mirëpritur rreth 80 mijë vizitorë vendas dhe të huaj. Turizmi po shndërrohet gjithnjë e më shumë në motorin kryesor të ekonomisë lokale, ndërsa panairet e traditës po kontribuojnë në ruajtjen dhe promovimin e identitetit kulturor të qytetit.