“Shakaja më e keqe e 1 prillit”, Ukraina kundër kryesimit të Rusisë në OKB

Presidenti i Ukrainës, Volodymyr Zelensky, e ka kritikuar marrjen e presidencës së Këshillit të Sigurimit të OKB-së nga Rusia si lajm “absurd dhe shkatërrues”.

Sipas tij, kjo e dëshmon “falimentimin e plotë të institucioneve ndërkombëtare”.

Duke folur në orët e vona të së shtunës, 1 prill, Zelensky tha se “ata që janë përgjegjës për terror” nuk duhet të lejohen të kryesojnë organet ndërkombëtare.

“Ushtria ruse vrau një tjetër fëmijë ukrainas, një djalë 5 muajsh nga Avdijivka… Dhe në të njëjtin moment, Rusia kryeson Këshillin e Sigurimit të OKB-së”, tha Zelensky.

Ministri i Jashtëm i Ukrainës, Dmytro Kuleba e përshkroi marrjen e presidencës së Këshillit nga Rusia më 1 prill, si pushtimi brutal i Ukrainës, që shtrihet në vitin e dytë si “shakaja më e keqe e 1 prillit në botë”.

Këshilltari presidencial në Ukrainë, Mykhaylo Podolyak, tha se kjo ngjarje ishte “një tjetër përdhunim i ligjit ndërkombëtar”.

“Një ent që bën një luftë agresive, shkel normat e ligjit humanitar dhe penal, shkatërron Kartën e OKB-së, neglizhon sigurinë bërthamore, nuk mund ta kryesojë organin kryesor të sigurisë në botë”, tha Podolyak në Twitter.

Rusia mori presidencën njëmujore, e cila ndërrohet në bazë të një rendi, të Këshillit të Sigurimit të OKB-së më 1 prill – për herë të parë që nga shkurti i vitit 2022, kur nisi luftën e saj të paprovokuar kundër Ukrainës.

LEXONI GJITHASHTU:

• Ukraina akuzon liderin e Kishës Ortodokse për qëndrime pro-ruse
• Makthet e ushtarëve ukrainas, mjekohen për stresin dhe kthehen në front