SHBA, BE dhe Britania do të mbështesin hetimin e krimeve ruse në Ukrainë

Ekspertë amerikanë dhe nga disa vende të tjera do të fillojnë të punojnë me homologët ukrainas brenda pak javësh për të mbledhur prova dhe për të identifikuar individët e përfshirë në sulmin e Rusisë kundër Ukrainës, të cilët mund të ndiqen penalisht për krimin e agresionit.

Qendra Ndërkombëtare për Hetimin e Krimeve të Agresionit, e formuar pak më parë, mori miratimin gjatë një takimi në Varshavë nga grupi që po heton mizoritë e luftës në Ukrainë, të përbërë nga Shtetet e Bashkuara, Bashkimi Evropian dhe Britania.

“Shtetet e Bashkuara do të dërgojnë një prokuror të posaçëm ndërsa vendet e tjera bënë premtime të ndryshme”,-tha ambasadorja amerikane për Dejtësinë Penale Globale, Beth Van Schaack, gjatë takimit në Varshavë.

“Institucioni në fjalë do të fillojë punën në fund të këtij muaji, duke mbledhur ekspertë të cilët do të punojnë krah për krah me homologët ukrainas në mënyrë që të vendosin bazat për aplikimin e përgjegjësisë penale individuale për krimin e agresionit të kryer në Ukrainë”,-tha ajo.

Qendra e re, që do ta ketë selinë në Hagë, është pjesë e grupit këshillues për krimet e mizorive që u krijua në maj të vitit 2022, për të mbështetur Zyrën e Prokurorit të Përgjithshëm të Ukrainës në hetimet dhe ndjekjen penale të krimeve të konfliktit, sipas faqes në internet të Departamentit të Shtetit.

LEXONI GJITHASHTU:

• Njohja e Kosovës po mban peng Serbinë? Përgjigjet analisti serb
• Pse zgjodhët Fred Belerin për Himarën? Meta: Arsyeja pse e mbështetëm