SHBA: Bisedimet në Majemi mbi Ukrainën “produktive”, në horizont takimi trepalësh

Shtëpia e Bardhë i ka cilësuar bisedimet e së dielës me zyrtarë ukrainas, evropianë dhe rusë në Majemi si “produktive dhe konstruktive”.

I dërguari i presidentit Trump për Ukrainën, Steve Witkoff, deklaroi se bisedimet synonin përshtatjen e qasjeve strategjike mes Ukrainës, Shteteve të Bashkuara dhe Evropës.

“Prioriteti ynë i përbashkët është të ndalim vrasjet, të garantojmë sigurinë dhe të krijojmë kushtet për rindërtimin e Ukrainës dhe një zhvillim afatgjatë të saj”, deklaroi Witkoff.

Sa i takon Rusisë, ai nënvizoi se ajo mbetet tërësisht e angazhuar për të arritur paqen. Edhe Moska, nga ana e saj, vlerësoi maksimalisht përpjekjet dhe mbështetjen e Shteteve të Bashkuara për zgjidhjen e konfliktit ukrainas dhe rivendosjen e sigurisë globale.

Në përfundim të raundit të së dielës, Uashingtoni propozoi takimin e parë kokë më kokë mes përfaqësuesve të Rusisë dhe Ukrainës.

Duke njoftuar lajmin, presidenti Volodymyr Zelensky u shpreh skeptik nëse Moska dëshiron vërtet t’i japë fund luftës. Kjo, pasi deri më sot Kremlini i ka refuzuar bisedimet trepalëshe.

Propozimi për një takim trepalësh në nivel këshilltarësh erdhi në përfundim të takimit mes të dërguarve amerikanë dhe atyre rusë në Majemi.

Witkoff dhe dhëndri i Trump, Jared Kushner, u takuan me të dërguarin e presidentit Putin, Kirill Dmitriev, i cili është gjithashtu kreu i Fondit Rus të Investimit.

Takimet ishin pjesë e përpjekjeve të Trump për t’i dhënë fund luftës, të cilat bënë që më herët gjatë javës të mbaheshin gjithashtu bisedime mes zyrtarëve ukrainas dhe evropianë në Berlin.