SHBA-ja dhe Japonia e dënojnë armatosjen e Rusisë nga Koreja e Veriut

Shtetet e Bashkuara, Japonia dhe Koreja e Jugut e kanë dënuar të enjten, siç thanë, furnizimin e Rusisë me municione dhe me pajisje ushtarake nga Koreja e Veriut, duke thënë se armatimi i tillë i rrit dukshëm dëmet dhe viktimat civile nga lufta e Rusisë në Ukrainë.

Në një komunikatë të përbashkët, sekretari i Shtetit i SHBA-së, Antony Blinken, ministri i Jashtëm i Koresë së Jugut, Park Jin, dhe ministri i Jashtëm i Japonisë, Yoko Kamikawa, thanë: “Ne do të vazhdojmë të punojmë së bashku me komunitetin ndërkombëtar për t’i zbardhur tentimet e Rusisë për të marrë pajisje ushtarake nga [Koreja e Veriut]”.

“Furnizimet me armë të tilla, disa prej të cilave mund të konfirmojmë se janë kryer, do ta rrisin jashtëzakonisht shumë numrin e humbjeve në njerëz nga lufta agresore e Rusisë”, thanë ata.

Deklarata e tyre vjen vetëm pak ditë pasi ministri i Jashtëm i Rusisë, Sergey Lavrov, e hodhi poshtë një deklaratë të mëparshme të SHBA-së se vendi i tij kishte marrë municione nga Koreja e Veriut, duke thënë se Uashingtoni ka dështuar ta dëshmojë këtë.

Koreja e Veriut dhe Rusia – të dyja të zhytura në konfrontime me SHBA-në dhe aleatët e saj – së fundmi kanë ndërmarrë hapa për t’i përforcuar marrëdhëniet ushtarake.

LEXONI GJITHASHTU:

• Sulm me armë në një restorant në SHBA, të paktën 22 të vdekur
• Lëvizjet e SHBA-së për të penguar Iranin përpara pushtimit të Gazës nga Izraeli