SHBA-ja dhe Rusia bisedojnë në Stamboll për misionet diplomatike

Delegacionet nga Shtetet e Bashkuara dhe Rusia u takuan më 10 prill në Stamboll për të diskutuar hapat drejt rikthimit të funksionimit të plotë të ambasadave të tyre, pas reduktimit të ndjeshëm të stafit diplomatik që pasoi nisjen e pushtimit rus të Ukrainës në vitin 2022.

Ky është takimi i dytë i këtij lloji dhe vjen në vazhdën e përpjekjeve të presidentit amerikan, Donald Trump, për përmirësimin e marrëdhënieve me Moskën dhe përpjekjet për t’i dhënë fund luftës në Ukrainë.

Sipas Departamentit amerikan të Shtetit, bisedimet e mbajtura në Stamboll kanë shënuar përparim drejt arritjes së një marrëveshjeje që do të mundësojë qasje më të lehtë në shërbimet bankare për diplomatët e të dyja vendeve, pavarësisht sanksioneve të SHBA-së ndaj Rusisë.

Një nga temat e diskutuara ka qenë edhe kufizimi i vendosur nga Moska më 2021, që ndalon punësimin e shtetasve rusë në ambasadën amerikane në Moskë, çështje që Uashingtoni e ka shprehur si shqetësim të vazhdueshëm.

Ambasadori rus në SHBA, Alexander Darchiev, deklaroi se bisedimet u zhvilluan “në një atmosferë pozitive”. Ai bëri të ditur se palët janë pajtuar për lehtësime në rregullat e lëvizjes së diplomatëve dhe në procesin e lëshimit të vizave, si dhe kanë diskutuar për mundësinë e rinisjes së fluturimeve direkte mes Moskës dhe Uashingtonit.

Darchiev theksoi gjithashtu se një nga prioritetet kryesore të Rusisë është rikthimi i pronës së patundshme diplomatike, e cila, sipas tij, është konfiskuar nga autoritetet amerikane dhe i përket Federatës Ruse.

Megjithëse dialogu diplomatik është intensifikuar pas rikthimit të Trumpit në Shtëpinë e Bardhë në janar, zyrtarët amerikanë kanë theksuar se këto bisedime nuk përfshijnë çështje politike apo të sigurisë. “Ukraina nuk është në agjendë”, tha zëdhënësja e DASH-it, Tammy Bruce, duke sqaruar se fokusi mbetet ekskluzivisht në marrëdhëniet dypalëshe SHBA-Rusi.

Takimi në Stamboll shihet si një hap i kujdesshëm drejt normalizimit të lidhjeve diplomatike midis dy fuqive botërore, në një kohë kur tensionet globale vazhdojnë, dhe ambasadat e tyre operojnë me kapacitete të kufizuara për shkak të dëbimeve reciproke të diplomatëve gjatë viteve të fundit.

LEXONI GJITHASHTU:

• Lukashenko: Mosmarrëveshjet ekonomike në botë mund të sjellin konfrontim ushtarak
• SHBA godet mallrat kineze me tarifë 145%