SHBA shton masat kundër përhapjes së Ebolës, kontrolle edhe në aeroport

Shtetet e Bashkuara kanë rritur masat parandaluese kundër përhapjes së virusit Ebola, ndërsa autoritetet shëndetësore theksojnë se rreziku për publikun amerikan mbetet i ulët.

Qendrat Amerikane për Kontrollin dhe Parandalimin e Sëmundjeve (CDC) njoftuan se do të shtojnë kontrollet për udhëtarët ajrorë që vijnë nga rajonet e prekura nga shpërthimi i virusit.

Sipas masave të reja, mbajtësit e pasaportave jo-amerikane që kanë udhëtuar në Uganda, Republica Demokratike e Kongos ose Sudani i Jugut gjatë 21 ditëve të fundit do të përballen me kufizime hyrjeje në SHBA.

Ndërkohë, Ambasada Amerikane në Kampala njoftoi pezullimin e përkohshëm të të gjitha shërbimeve të vizave.

“Në këtë moment, CDC e vlerëson rrezikun e menjëhershëm për publikun amerikan si të ulët, por do të vazhdojmë të monitorojmë situatën dhe mund të përshtatim masat e shëndetit publik në varësi të zhvillimeve”, thuhet në deklaratën e agjencisë.

Presidenti amerikan Donald Trump deklaroi se është “i shqetësuar” për shpërthimin e Ebolës, por shtoi se beson se virusi “është kufizuar për momentin në Afrikë”.

Masat e reja vijnë pasi një shtetas amerikan rezultoi pozitiv me virusin Ebola në Republikën Demokratike të Kongos, pas ekspozimit gjatë punës së tij në vend.