SHBA sulmon 2 anije me drogë në Paqësor, 6 të vdekur

Shtetet e Bashkuara nisën një sulm ndaj dy anijeve të dyshuara për transportimin e narkotikëve në Oqeanin Paqësor lindor, duke vrarë gjashtë persona, tha Sekretari i Mbrojtjes i SHBA-së, Pete Hegseth.

“Shërbimi ynë i inteligjencës ka përcaktuar se këto anije janë të lidhura me kontrabandën e drogës, se ato po transportonin drogë dhe se po lëviznin përgjatë një rruge të njohur për kontrabandën e drogës”, tha Hegseth sot në një postim në Platformën X, i cili u shoqërua me një video të operacionit, raportoi Reuters.

Siç deklaroi ministri amerikan, të dy sulmet u kryen në ujëra ndërkombëtare dhe në secilën anije kishte nga tre “narko-terroristë”.

“Nën Presidentin (e SHBA-së) (Donald) Trump, ne po mbrojmë atdheun dhe po i vrasim këto kartele terroriste që duan të dëmtojnë vendin dhe popullin e tij”, përfundoi Hegseth.

Sipas deklaratave të mëparshme të Ministrit Hegseth, që nga shtatori, SHBA-të kanë kryer 14 sulme ajrore ndaj anijeve pranë bregdetit të Venezuelës, si dhe në pjesën lindore të Oqeanit Paqësor.

LEXONI GJITHASHTU:

• Vala e të ftohtit përfshin SHBA, temperatura të ulëta rekord
• BE dërgon anije luftarake në brigjet e Somalisë pas sulmit të dyshuar pirat