SHBA zbulon mbi 1 milion dokumente të reja për rastin Epstein

Autoritetet amerikane kanë zbuluar më shumë se një milion dokumente shtesë që mund të lidhen me çështjen e Jeffrey Epstein dhe pritet që ato të publikohen në ditët dhe javët në vijim.

Zyrtarë të Prokurorisë së SHBA-së për Distriktin Jugor të Nju Jorkut dhe FBI-ja kanë njoftuar Departamentin e Drejtësisë (DoJ) për zbulimin, duke ia dorëzuar materialet avokatëve për shqyrtim.

Departamenti i Drejtësisë bëri të ditur se ekipet ligjore po punojnë pa ndërprerje për të realizuar redaktimet e nevojshme ligjore, me qëllim mbrojtjen e identitetit të viktimave, përpara publikimit të dokumenteve. Sipas DoJ, për shkak të vëllimit të madh të materialeve, procesi mund të zgjasë edhe disa javë.

Zbulimi vjen vetëm pak ditë pasi Departamenti i Drejtësisë publikoi mijëra dokumente të tjera lidhur me hetimet ndaj Epstein, disa prej tyre të redaktuara ndjeshëm. Publikimi i dosjeve u bë pas miratimit nga Kongresi të Aktit të Transparencës së Dosjeve Epstein, i nënshkruar në ligj nga presidenti amerikan Donald Trump, i cili kërkon transparencë të plotë duke garantuar njëkohësisht mbrojtjen e viktimave.