Shefi i OpenAI mohon akuzat e motrës për përdhunim në fëmijëri

Motra e shefit ekzekutiv të OpenAI, Sam Altman, Ann Altman, ka ngritur një padi duke pretenduar se ai e ka abuzuar seksualisht me të midis viteve 1997 dhe 2006.

Padia, e cila u ngrit më 6 janar në një Gjykatë në Distriktin Lindor të Misurit, pretendon se abuzimi filloi kur ajo ishte tre vjeç dhe Altman ishte 12 vjeç.

Në një deklaratë të përbashkët në X , me nënën dhe dy vëllezërit e tij, shefi i OpenAI mohoi akuzat, duke thënë se “të gjitha këto pretendime janë krejtësisht të pavërteta”.

“Përkujdesja për një anëtar të familjes që përballet me sfida të shëndetit mendor është tepër e vështirë”, shtoi ai në deklaratë.

“Kjo situatë shkakton dhimbje të pamasë për të gjithë familjen tonë”, nënvizoi Altman.

Në dosjen, e  siguruar nga BBC, e motra pretendon se abuzimi, i cili ndodhi gjatë disa viteve rresht, përfshinte përdhunim.

Padia shtoi se rasti i fundit i abuzimit të supozuar ndodhi kur Altman ishte një i rritur, por ajo ishte ende e mitur.

Zonja Altman ka bërë më parë akuza të ngjashme kundër vëllait të saj në platformat e mediave sociale si X.

Altman është një nga figurat më të larta të botës së teknologjisë.

Në fund të vitit 2022, OpenAI lançoi chatbotin e inteligjencës artificiale gjeneruese ChatGPT.