Sherr mes të miturve në Pogradec, dëmtohen në fytyrë dhe trup 2 prej tyre

Një sherr raportohet të ketë ndodhur midis dy të miturve brenda ambienteve të shkollës së mesme të Bucimasit në Pogradec.

Sipas burimeve për Euronews Albania, bëhet me dije se nga sherri të dy të miturit kanë pësuar dëmtime në trup dhe fytyrë.

Po ashtu mësohet se minorenët janë pjesë e së njëjtës klasë dhe sherri ka nisur për motive të dobëta.

Pjesë e konfliktit janë bërë dhe të tjerë të mitur të cilëve u është marrë deklarimi, ndërkohë që çështja ju referua prokurorisë për plagosje të lehtë me dashje.

Njoftimi i Policisë:

Pogradec-Specialistët për Hetimin e Krimeve të Komisariatit të Policisë Pogradec referuan materialet në Prokurori ku filloi procedimi penal në gjendje të lirë për një 17-vjeçar, banues në fshatin Buçimas, Pogradec, pasi gjatë një konflikti për motive të dobëta, dyshohet se ka goditur me grushte, një bashkëmoshatarin e tij, në ambientet e shkollës së tyre të mesme.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.