Sherr mes të rinjve në Korçë, përplasje fizike me sende të forta! Përfundon një person në spital

Një konflikt mes disa të rinjve është regjistruar në qytetin e Korçës, në lagjen nr. 2, pranë kinemasë së qytetit.

Sipas burimeve, të rinjtë janë përfshirë në një përplasje fizike, duke u goditur me grushte, ndërsa dyshohet se gjatë sherrit janë përdorur edhe sende të forta.

Si pasojë e konfliktit, një person ka mbërritur në spital me dëmtime trupore. Burime mjekësore bëjnë me dije se ai dyshohet të jetë goditur dhe më pas është rrëzuar në kangjella, çka i ka shkaktuar çarje. Aktualisht, i dëmtuari ndodhet nën kujdesin e mjekëve dhe është jashtë rrezikut për jetën.

Forcat e policisë kanë mbërritur menjëherë në vendngjarje, por personat e përfshirë në konflikt janë larguar para mbërritjes së tyre.

Ndërkohë, grupi hetimor ka nisur punën për zbardhjen e plotë të rrethanave të ngjarjes, duke sekuestruar pamjet e kamerave të sigurisë në bizneset përreth dhe duke marrë në pyetje dëshmitarë të mundshëm.

Hetimet vijojnë, ndërsa pritet të dalin detaje të tjera në vijim.

“Korçë/Informacion paraprak. Mëngjesin e sotëm, në lagjen nr. 2, Korçë, ka ndodhur një konflikt fizik midis disa shtetasve. Si pasojë e konfliktit është dëmtuar me mjet prerës një 17-vjeçar, banues në Korçë, i cili po merr mjekim në spital, jashtë rrezikut për jetën.

Në ambientet e Komisariatit ndodhet i shoqëruar një shtetas, për veprime të mëtejshme procedurale. Grupi hetimor po punon për sqarimin e mëtejshëm të rrethanave të ngjarjes”, njofton policia.