Sherri në familjen mbretërore, prokuroria kërkon dënimin e Princit, Elias dhe babait

Prokuroria e Tiranës ka paraqitur pretencën për përplasjen mes Princit Leka II, Gjergj Zaharisë dhe Elia Zaharisë. Organi i akuzës ka kërkuar dënime të ndryshme për secilin prej të akuzuarve. Për Princ Lekën, organi i akuzës kërkon një dënim prej 1 vit e 6 muaj burg, me propozimin që dënimi të konvertohet në shërbim prove nga Gjykata e Tiranës.

Gjithashtu, prokurori Dritan Nushi ka kërkuar 1 vit burg për Gjergj Zaharinë, babain e Elia Zaharias, ndërsa për vetë ish-bashkëshorten e princit Elia Zaharia, prokuroria ka kërkuar 6 muaj burg, gjithashtu të konvertuar në shërbim prove.

Tre të akuzuarit janë përballur me akuzën për “dhunë në familje” dhe çështja është trajtuar nëpërmjet procedurës së gjykimit të shkurtuar, e cila ul dënimin maksimal për akuzat e ngritura. Seanca e radhës, ku do të shpallet vendimi përfundimtar, është caktuar për 13 dhjetor.

Vendimi pritet të jepet nga gjyqtarja Migena Laska.

Elia Zaharia së bashku me babain e saj Gjergj Zaharia, u përfshinë në një konflikt fizik me Princ Lekën gjatë periudhës së divorcit të ish-çiftit.

Hetimet nga prokuroria nisën pas publikimit të një videoje në rrjetet sociale ku ish-çifti, Leka Zogu dhe Elia Zaharia, shfaqeshin në momente tensioni, përfshirë përplasje verbale dhe fizike.

Pas publikimit të videos, Princ Leka dhe Elia Zaharia kanë bërë kallzim në polici, ku akuzuan njëri-tjetrin për dhunë fizike.

Princi denoncoi se është dhunuar me sende të forta nga ish-vjehrri, Gjergj Zaharia. Ndërkohë akuzat u hodhën poshtë nga Gjergj dhe Elia Zaharia të cilët pretenduan se janë ata viktima e ngjarjes.

LEXONI GJITHASHTU:

• Mbyllen hetimet për videon e dhunës mes Elias dhe Princ Lekës, kush e shpërndau
• Princ Leka dhe Elia Zaharia zyrtarisht të divorcuar, Teli: Ja si do ndahet pasuria
• Princ Leka dhe Elia Zaharia zyrtarisht të divorcuar, zbardhen arsyet e ndarjes