Shezlongjet bëhen “mollë sherri” në Sarandë dhe Ksamil

Anëtarët e këshillit bashkiak të Sarandës e quajtën situatën me menaxhimin e plazheve si burim të pastër konflikti.

Shqetësuese për këshilltarët bashkiakë është fakti, se në pikun e sezonit turistik, ende nuk janë ndarë sipërfaqet e shfrytëzimit. Ibrahim Bajrami, Arben Çipa, Mehmet Nelaj dhe anëtarë të tjerë të Këshillit Bashkiak kërkuan ndërhyrjen e kryeministrit në këtë situatë për të zgjidhur problematikat.

“Unë do t’i kërkoj kryetarit të bashkisë dhe këshillit bashkiak që t’i drejtohen kryeministrit të Shqipërisë për të vënë dorë sa më parë për të gjithë deformimet që janë bërë në zënien e plazheve. Ka skandale. Në luftë jemi apo në biznes”, tha këshilltari bashkiak Mehmet Nelaj.

“Kush ka fuqi me qeverinë qendrore mund ta përfitojë. E kemi me raste edhe me emra po të doni. Kemi arritur në raste se kush ka kallash edhe mund ta fitojë”, tha Dritan Peçi.

Pas pyetjeve të këshilltarëve reagoi sekretari i bashkisë Sarandë Eleron Gjoni. Sipas tij ka vonesa ne procedurat e pajisjes me kontrata të subjekteve, por situata po shkon drejt normalitetit.

Mund të këtë pretendime të ndryshme, por nuk e shikoj situatën tragjike sa u diskutua këtu nga disa. Në total kemi 155 stacione plazhi ,deri tani ka ardhur miratimi paraprak për 100 stacione plazhi”, tha ai.

Bashkia Sarandë ka 155 stacione plazhi, ndërkohë që vetëm 20 për qind e sipërfaqes së plazhit është lënë plazh publik.

Gjatë gjithë paradites, forca të shumta policie, kanë ushtruar kontrolle në plazhet përgjatë vijës bregdetare nga Saranda deri në Ksamil, për të evidentuar rastet abuzive të zënies së hapësirave të plazhe pa leje.

LEXONI GJITHASHTU: 

• “Mos i ndodhtë askujt”, babai i vëllezërve të vrarë në Velipojë tregon se sherri nisi për shezlongët
• 4 të vrarë e 2 të plagosur pas një përplasje me armë në Velipojë