Shifrat/ Rriten kërkesat për ndihmë juridike falas në Gjirokastër

Rriten kërkesat për ndihmë juridike falas në Gjirokastër, 364 raste vetëm në 2025

Në Gjirokastër po shënohet një rritje e ndjeshme e kërkesave për ndihmë juridike falas. Vetëm gjatë vitit 2025 janë regjistruar 364 raste, ku shumica e përfituesve janë familje me të ardhura të pakta, të cilat nuk arrijnë të përballojnë kostot e larta të shërbimeve ligjore. Në rritje janë gjithashtu edhe rastet e dhunës në familje, çështjet e zgjidhjes së martesës dhe pronësisë.

Një prej punonjësve të Qendrës së Ndihmës Juridike Falas shprehet:
“Përgjatë vitit 2025 kemi patur një numër të konsiderueshëm rastesh, shumë qytetarë janë drejtuar pranë ndihmës juridike Gjirokastër për të marrë shërbim ligjor falas, duke filluar nga marrja e një avokati falas, përjashtimi i tarifave dhe shpenzimeve gjyqësore, si dhe këshillimi ligjor,” thotë Klaudja Veizaj.

Falë sensibilizimit, po rritet gjithashtu numri i denoncimeve nga qytetarët për problematika të ndryshme, si dhuna në familje, çështjet e pronësisë apo zgjidhjet e martesës.
“Për muajin janar kemi patur rritje të numrit të rasteve. Shumë qytetarë kanë qenë të interesuar për marrjen e informacionit, nuk kanë munguar zgjidhjet e martesës si dhe çështjet e pronave,” shton Veizaj.

Rritja e kërkesave lidhet kryesisht me pamundësinë ekonomike të qytetarëve për të përballuar kostot e ndjekjes së çështjeve ligjore.
“Qytetarët kanë mundësi të përfitojnë falas shërbim ligjor, duke filluar nga këshillimi ligjor dhe marrja e informacioneve mbi ligjet në Republikën e Shqipërisë. Këto ofrohen tërësisht falas, ndërsa kostot e një avokati privat janë të larta për një familje në nevojë,” thekson Klaudja Veizaj.

Qendra e Ndihmës Juridike vazhdon të ofrojë shërbim ligjor për qytetarët në pamundësi ekonomike, viktimat e dhunës, personat me aftësi të kufizuara dhe grupe të tjera vulnerabël.