Shijaku 4 ditë pa ujë të pijshëm, banorët furnizohen me ujë të blerë

Një problem teknik ka bërë që Shijaku të mbetej katër ditë pa furnizim me ujë të pijshëm. Problemi u zgjidh sot, teksa banorët treguan për Euronews Albania se u detyruan të blejnë ujë privatisht dhe të furnizohen me bote.

“Tre ditë ndenjëm, enët pa larë, mbrëmë blemë ujin që i lamë. Jo vjen sot, jo vjen nesër… S’ka!” – thotë Bujar Metalla.

“është dita e katërt sot që ne jemi pa ujë. E kemi mbajtur lavatriçen me bidonë duke i hedhur ujë avash-avash, duke larë, duke shpëlarë.” – ankohet Zelie Hakeci.

Sipas banorëve 100 litra ujë për furnizimin e më pak se një boti u kushton 1,000 lekë.

“Ku ta çosh më parë atë bot uji, a të lash rrobat, shtëpitë, ku t’i marrësh, për 10 mijë lekë këta po punojnë 8 orë në punë,” – vijon banori.

Pas interesimit të Euronews Albania, rreth mesditës së të mërkurës, uji u rikthye. Sipas Drejtorit të Ujësjellës-Kanalizime Shijak, Ivo Doçi, shkak për mungesën e ujit ishte një problem teknik në stacionin kryesor në Fushë Prezë.