Shijaku mirëpret mbi 2500 motoristë nga 50 vende në “Motor Fest”

Shijaku u kthye mbrëmjen e së shtunës në kryeqendrën e motoristëve, duke mirëpritur mbi 2500 pjesëmarrës nga më shumë se 50 vende të botës dhe diaspora shqiptare në edicionin e pestë të “Motor Fest”.

Atmosfera festive nisi që në orët e pasdites, kur grupe motoristësh nga Shqipëria, Kosova, Mali i Zi, Maqedonia e Veriut, Greqia, Italia, Franca, Gjermania, Holanda, Suedia, Danimarka, Zvicra dhe vende të tjera mbërritën në qytet për t’u bërë pjesë e aktivitetit.

Parada e motorëve u zhvillua në itinerarin Shijak–Durrës–Shijak, duke tërhequr vëmendjen e qytetarëve dhe turistëve. Pas një ndalese në shëtitoren “Taulantia” në Durrës, motoristët u rikthyen në qendër të Shijakut, ku festa vijoi deri në orët e vona të natës.

Muzika rock, koncertet live dhe aktivitetet argëtuese krijuan një atmosferë të veçantë për pjesëmarrësit, të cilët ndanë përvoja, histori udhëtimesh dhe krijuan miqësi të reja.

I kthyer tashmë në një traditë të fillimit të sezonit veror, “Motor Fest” synon të promovojë kulturën e motoristëve, por edhe turizmin lokal, duke sjellë çdo vit vizitorë nga vende të ndryshme të Europës dhe më gjerë.