Shkaktoi aksidentin me 2 viktima 2022, Apeli shpall të pafajshëm shoferin

Gjykata e Apelit ditën e sotme ka shpallur të pafajshëm Marsel Bushon, 35 vjeç për veprën penale “Shkaktim aksidenti me pasojë vdekje”.

Busho u shpall fajtor rreth dy vite më parë pasi u përfshi në një aksident në Rrugën e Kombit, ku për pasojë humbën jetën dy miqtë e tij, që udhëtonin në makinë me të, Denis Gjeta dhe Marius Çeça.

Për aksidentin e ndodhur më 20 gusht të vitit 2022 Gjykata e Lezhës dënoi me 5 vjet burg Bushon, por ky i fundit nuk do të kryejë asnjë vit burg.

“Deklarimin fajtor të pandehurit M. B për kryerjen e veprës penale të parashikuar nga neni 290/4 të Kodit Penal e në bazë të kësaj dispozite denimin e tij me 5 (pesë) vite burgim.

Në aplikim të nenit 406 të Kodit të Proçedurës Penale, duke i ulur 1/3 e dënimit të mësipërm, i pandehuri M. B dënohet me 3 (tre) vite e 4 (katër) muaj burgim.

Çështja në apel u shqyrtua mbi bazën e ankimit të  bërë nga i pandehuri me iniciale M. B, i cili kërkoi deklarimin e pafajshëm, në alternativë në mbështetje të nenit 59 të K.Penal dënimin e tij me minimumin që parashikon dispozita ligjore dhe pezullimin e ekzekutimit të dënimit për pjesën e pavuajtur / mbetur të dënimit”-njofton Gjykata.

Busho asokohe humbi kontrollin e mjetit në afërsi të Rubikut, duke përfunduar i përplasur me barrierat metalike. Gjeta dhe Çeça humbën jetën në vend.

LEXONI GJITHASHTU: 

• Macron i qëndron planit të dërgimit të trupave në Ukrainë: E kam menduar mirë
• Rithemelimi në krah të  Belerit/ Noka: I burgosur politik ashtu si Sali Berisha