Shkarkimi i Bledi Çuçit, Bardhi: Dorëzimi i MB përballë krimit, kapitullim i shtetit

Kreu i Grupit Parlamentar të Partisë Demokratike, Gazment Bardhi ka reaguar në lidhje me shkarkimin nga detyra të ministrit të brendshëm Bledi Çuçi dhe emërimin në këtë detyrë të Taulant Ballës.

Përmes një postimi në Twitter, Bardhi shkruan se dorëzimi i Ministrisë së Brendshme në duart e krimit është kapitullim i shtetit. Ai nënvizon se vetëm në qeverinë e kryeministrit Rama ndodh që ministrat e Brendshëm të mos liftojnë krimin por të forcojnë lidhjet me të.

“Botërisht dihet që Ministrat e Brendshëm emërohen për të luftuar krimin e organizuar. Vetëm në Qeverinë e Edi Ramës ndodh që të emërohen për të forcuar dhe konsoliduar më tej lidhjet mes krimit të organizuar dhe qeverisjes!

Akti i sotëm i Edi Ramës është shumëfish më i rëndë sesa vetë ngjarja që solli shkarkimin e merituar të ish Ministrit Çuçi! Dorëzimi i Ministrisë së Brendshme në duart e krimit të organizuar është kapitullim i shtetit!”, shkruan Bardhi në Twitter.

LEXO GJITHASHTU:

• Shkarkohet Bledi Çuçi, Taulant Balla emërohet Ministër i Brendshëm
• U shkarkua si Ministër i Brendshëm, reagon Bledi Çuçi