Shkarkimi i Veliajt, Alimehmeti-socialistëve: Bashkëfajtorë, vjedhjet s’i bëri vetëm

Ilir Alimehmeti, anëtari demokrat i Këshillit Bashkiak të Tiranës, tha në mbledhjen e sotme kur pritet propozimi për shkarkimin e kryebashkiakut Erion Veliaj, se këshilltarët socialistë duhet të mbajnë pjesën e përgjegjësisë që u takon për ato që i quajti aferat e kryera nga Veliaj, përgjatë më shumë se 2 mandateve.

Alimehemti tha se Veliaj është një kapitull i mbyllur, por bashkëpunëtorët e tij mbeten përgjegjës.

“Vjedhjet Erion Veliaj nuk i ka bërë vetë, por duke bashkëpunuar me ju. Shkuat ju për të protestuar para SPAK për të kundërshtuar masën e arrestit ndaj Veliajt. Ju e  bëtë këtë që po bëni, vetëm pasi iu tha kryeministri. Veliaj është aty ku është për shkak të dëmeve financiare që ka bërë. Veliaj është kapitull i mbyllur dhe ai e di shumë mirë këtë. U mbyll në këtë formë, por ju jeni kapitull i hapur. Ju ishit elementi kontrollues i tij dhe nuk e bëtë punën tuaj”, tha Alimehmeti.