Shkencëtarët kinezë klonojnë për herë të parë dhi tibetiane

Shkencëtarët kinezë kanë klonuar për herë të parë dhi tibetiane, të cilat, së bashku me kuajt dhe delet, janë bagëti të rëndësishme tregtare për banorët e Rrafshnaltës Tibetiane, por raca e të cilave ka degjeneruar vitet e fundit.

Për të parandaluar humbjen e kafshëve të rëndësishme për ekonominë lokale, qeveria e provincës veriperëndimore kineze të Qinghai ka kryer një program kërkimi mbi aplikimin e teknologjisë së inxhinierisë embrionale te dhitë tibetiane që nga viti 2018, shkruan portali kinez “People’s Daily”.

Programi i klonimit pritet të ndihmojë në përzgjedhjen e individëve më të mirë të racës së dhive tibetiane, ruajtjen e popullsisë së tyre dhe rritjen e të ardhurave të fermerëve dhe barinjve vendas.

Si pjesë e hulumtimit, ekspertët zgjodhën katër të rritur dhe përdorën qelizat e tyre për të krijuar klone. Si rezultat, ata morën dy dhi të shëndetshme të klonuara që peshonin rreth 3.5 kg secila.

Sipas shkencëtarëve, klonimi i suksesshëm i individëve më të fortë dhe më të përshtaturve për jetën në kushtet e malësisë është një përparim i madh në teknologjinë tibetiane të mbarështimit të dhive dhe do të ndihmojë që raca e tyre të rifitojë përshtatshmërinë dhe të shmangë degjenerimin.

LEXONI GJITHASHTU:

• Raportohet për patrullime të reja të ushtrisë kineze afër Tajvanit
• Viti i Dragoit: Gjithçka që duhet të dini për Vitin e Ri Kinez 2024