Shpërthim me lëndë plasëse në Rrilë të Lezhës, dëmtohet një banesë

Një shpërthim me lëndë plasëse është regjistruar në orët e para të mëngjesit të së shtunës në fshatin Rrilë, në Lezhë.

Sipas informacioneve paraprake, lënda plasëse është vendosur në derën e një banese dykatëshe në pronësi të shtetasit Mirash Mirashi. Ngjarja ka ndodhur rreth orës 03:00.

Burime nga vendngjarja bëjnë me dije se në momentin e shpërthimit, brenda banesës ndodheshin bashkëshortët, të cilët fatmirësisht nuk kanë pësuar lëndime.

Si pasojë e shpërthimit janë shkaktuar dëme të konsiderueshme materiale në objekt.

Menjëherë pas ngjarjes, në zonë kanë mbërritur forca të shumta policie, të cilat kanë nisur hetimet për identifikimin e autorëve dhe zbardhjen e plotë të rrethanave dhe motiveve të këtij sulmi me eksploziv.