Sulmi në Zubin Potok, Kurti mbledh Këshillin e Sigurisë, aktivizohet…

Qeveria e Kosovës ka mbledhur Këshillin e Sigurisë pas aktit terrorist të ndodhur në Zubin Potok ku një shpërthim i fuqishëm dëmtoi kanalin e ujit të Ibër-Lepencit, nga ku furnizohen me ujë nga Liqeni i Ujmanit disa qytete të vendit, si dhe Korporata Energjetike e Kosovës për ftohjen e termoelektranave të saj.

Këshilli i Sigurisë aprovoi masa shtesë për të forcuar sigurinë rreth objekteve dhe shërbimeve kritike si ura, trafostacione, antena, liqene, kanale etj., pas sulmit në Zubin Potok ku për shkatërrimin e kanalit të Ibër-Lepencit janë përdorur rreth 15 kilogramë eksploziv.

“Policia e Kosovës dhe Forca e Sigurisë së Kosovës do të aktivizohen në terren për këtë qëllim. Po ashtu është intensifikuar bashkëpunimin ndërinstitucional dhe ai ndërkombëtar për të parandaluar sulme të ngjashme në të ardhmen”, thuhet në komunikatën e lëshuar nga Qeveria e Kosovës, pas mbledhjes së jashtëzakonshme të Këshillit të Sigurisë, të mbajtur në orët e para të mëngjesit të sotëm.

Në mbledhjen që u thirr pas sulmit të tretë në 72 orët e fundit, bëhet e ditur se u potencua edhe njëherë se indikacionet e para sugjerojnë se shpërthimi në kanalin e ujit që furnizon KEK-un me ujë është orkestruar nga shteti serb.

LEXONI GJITHASHTU:

• Aksion i madh i policisë së Kosovës në rajonin e Zubin Potokut
• Hovenier dënon sulmin në Zubin Potok: SHBA qëndron pranë Kosovës