Shqipëria ende nuk e ka përcaktuar zyrtarisht minimumin jetik

Në kohën kur në Bashkimin Europian po diskutohet një nismë legjislative lidhur me miratimin e një direktive mbi pagën minimale, Shqipëria nuk ka ende të përcaktuar zyrtarisht minimumin jetik.

Përpjekjet e përkufizimit të minimumit jetik, ndër vite, nuk kanë prodhuar ndonjë rezultat konkret.

Institucioni i Avokatit të Popullit në bashkëpunim me zyrën e Programit të Kombeve të Bashkuara për Zhvillimin në Shqipëri, ka prezantuar draft-raportin ”për minimumin jetik në shqipëri”, i cili pas përfundimit të konsultimit me publikun, do t’i dorëzohet Kuvendit të Shqipërisë.

Sipas Avokatit të Popullit vlera e përllogaritur në studimin e minimumit jetik në Shqipëri për vitin 2019 është përafërsisht 17,875 lekë.

Kjo vlerë është 9,9 % më e lartë sesa pensioni minimal për zonat urbane, 37,5 % më e lartë se pagesa e papunësisë dhe rreth 3 herë më e lartë se ndihma ekonomike.

Vlera e përllogaritur e minimumit jetik, është 45,5 % më e ulët sesa paga minimale në vend.

Avokati i Popullit ka rekomanduar që përkufizimi i “minimumit jetik” të reflektohet në të gjithë paketën legjislative që garanton dhe siguron mbrojtjen sociale në Republikën e Shqipërisë.

Të përdoret, në themel të hartimit të politikave sociale për shtresat në nevojë dhe po ashtu si referencë për të përcaktuar pensionin minimal urban dhe rural, pagën minimale, ndihmën ekonomike dhe pagesën e papunësisë.

Prej shumë vitesh, masa e tyre nuk është e mjaftueshme për të mbuluar shpenzimet për ushqimin por edhe për aktivitete të tjera të zhvillimit njerëzor për individët dhe familjet përfituese. 

Në Anketën e të Ardhurave dhe Nivelit të Jetesës, publikuar nga INSTAT, treguesi i rrezikut për të qenë i varfër në Shqipëri, në vitin 2019 është 23 %.

Kufiri i rrezikut për të qenë i varfër për një person në këtë anketë është vlerësuar me 170.785 lekë, në krahasim me 160.742 lekë që ishte në vitin 2018.

Raporti i Bankës Botërore për vitin 2020, thekson se Shqipëria ka nivelin më të madh të varfërisë në Ballkanin Perëndimor; rreth një e treta e njerëzve të saj jetojnë me më pak se 5.5 dollarë në ditë.