Shqipëria kërkon tre pikët në Letoni, “humbet” dy shtyllat e mbrojtjes

Kombëtarja shqiptare do të zbresë sërish në fushë mbrëmjen e kësaj të marte pa dy prej shtyllave të repartit mbrojtës.

Pas mungesës së konfirmuar të kapitenit Berat Gjimshiti për shkak kartonësh, trajneri Sylvinho duhet të përballet në ndeshjen ndaj Letonisë edhe me një tjetër humbje të rëndësishme: Arlind Ajetin.

Mbrojtësi kuqezi ka shfaqur shqetësime muskulore në prag të ndeshjes dhe pas vlerësimit të stafit mjekësor është vendosur që ai të mos jetë i gatshëm për sfidën e sotme. Ajeti ishte titullar në përballjen ndaj Serbisë, ku dha një paraqitje solide, por gjendja fizike nuk e lejon të vijojë me ritmin e lartë të këtyre kualifikueseve.

Kombëtarja shqiptare mbetet kështu e reduktuar në prapavijë, megjithatë pjesa tjetër e grupit është në dispozicion të plotë dhe stafi teknik pritet të bëjë zgjidhjet e duhura për të ruajtur balancat në mbrojtje.

Ndeshja ndaj Letonisë është e katërta për Shqipërinë, e cila do të synojë marrjen e tre pikëëve tepër të rëndësishme.