Shqipëria përmbyll presidencën e Këshillit të Sigurimit në OKB

Shqipëria ka përmbyllur Presidencën e dytë dhe të fundit në Këshillin e Sigurimit në OKB në fokus të së cilës ishte nevoja urgjente për të mbështetur ligjin ndërkombëtar dhe Kartën e OKB-së, si dhe përshpejtimi i ndihmës humanitare në mbarë botën.

Në përmbyllje të presidencës, ministri për Evropën dhe Punët e Jashtme Igli Hasani shkruan se Shqipëria është krenare që ka mbajtur me sukses peshën e drejtimit të Këshillit të Sigurimit në OKB në periudha kaq kritike.

Gjatë muajit shtator që Shqipëria mbajti presidencën, drejt Shteteve të Bashkuara të Amerikës udhëtuan kryeministri Edi Rama dhe presidenti Bajram Begaj. Kreu i qeverisë shqiptare drejtoi më 20 shtator edhe debatin e nivelit të lartë me fokus tek ruajtja e paqes dhe sigurisë së Ukrainës, ku pjesëmarrës ishte edhe presidenti Volodimir Zelenksy.