Shqiptari i arratisur nga burgu në Greqi, plagos ukrainasen dhe i merr 2 mijë euro

Një 27-vjeçar shqiptar ka plagosur me thikë një turiste 25-vjeçare nga Ukraina në zonën e Kasandrës, në Halkidiki të Greqisë. Ngjarja ka ndodhur në një banesë të marrë me qira në zonën e Kipsës, ku autori, Ylli Shkalla, është futur për të grabitur.

Sipas autoriteteve greke, ai ka vjedhur 2,000 euro dhe një telefon celular, ndërsa më pas ka qëlluar me thikë të renë ukrainase, duke i shkaktuar plagë të rënda. Viktima është transportuar menjëherë në qendrën shëndetësore të Kasandrës, ku po merr trajtimin mjekësor të nevojshëm.

Ndërkohë, policia greke ka nisur një operacion të gjerë për kapjen e autorit, i cili rezulton të jetë arratisur vetëm një ditë më parë nga burgu bujqësor i Kasandrës. Shkalla, me origjinë nga Tirana, ishte duke vuajtur një dënim në regjim gjysmë të lirë, ku ishte i angazhuar në punë të ndryshme brenda institucionit.

Ai është i njohur për autoritetet shqiptare, pasi në shkurt të vitit 2017 ishte arrestuar për përfshirje në nëntë raste vjedhjesh në bashkëpunim në Tiranë.

Autoritetet greke vijojnë kërkimet për arrestimin e tij, ndërsa ngjarja ka shkaktuar shqetësim në opinionin publik grek dhe ndër turistët në zonë.

LEXONI GJITHASHTU:

• Arratiset 27-vjeçari shqiptar nga burgu në Greqi, autoritetet në kërkim të tij
• Eurobasket: Gjermania shpallet kampione, Greqia në vendin e tretë