Shtatë të vdekur nga Covid-19, bie numri i infektimeve

Shtatë qytetarë të prekur me Covid-19 kanë humbur jetën në Shqipëri. Lajmi bëhet i ditur nga Ministria e Shëndetësisë, e cila po ashtu thekson se nga kryerja 2684 testeve të dyshuara, 238 prej tyre kanë rezultuar pozitivë.

Numri i të shtruarve në spitale vijon të mbetet ende i lartë. Aktualisht sipas MSH-së në spitalet e Tiranës, por edhe ato rajonale po marrin shërbim 221 pacientë, 14 në terapi intensive, nga të cilët 3 pacientë janë të intubuar.

Po ashtu listës së të shëruarve i janë shtuar edhe 517 qytetarë, duke e çuar në total numrin e tyre në 97 723.

Që nga fillimi i pandemisë në Shqipëri kanë ndërruar jetë 2317 persona, shumica e të cilëve me sëmundje bashkëshoqëruese.

Qarku më i prekur nga coronavirus në Shqipëri vijon të mbetet Tirana, e cila, raporton numrin më të lartë të infektimeve dhe vdekjeve.

Por, pavarësisht këtyre treguesve, Komiteti Teknik i Ekspertëve ka lajmëruar se duke filluar nga e hëna ora policore do të fillojë në orën 22:00, çka do të thotë se qytetarët do mund të lëvizin dy orë më tepër.