Shtatë turistë humbin jetën në Rusi, u mbytën pasi po lëviznin mbi akull me makinë

Shtatë persona humbën jetën në Rusi pasi një automjet ra përmes akullit në Liqeni Baikal, në rajonin e Irkutskut. Viktimat ishin turistë nga Kina që po udhëtonin mbi sipërfaqen e ngrirë të liqenit.

Sipas mediave lokale, makina po lëvizte mbi akull të hollë. Si pasojë e një çarje, automjeti theu sipërfaqen dhe u fundos në një thellësi prej rreth 18 metrash.

Vetëm një turist arriti të shpëtonte dhe tashmë ka dhënë dëshmi para hetuesve. Shoferi dhe shtatë turistë, mes tyre një çift me një fëmijë 14-vjeçar, humbën jetën. Zhytësit vijojnë operacionin në vendngjarje dhe, sipas raportimeve, trupat e të gjitha viktimave janë lokalizuar.

Autoritetet kanë nisur një hetim penal për incidentin, bazuar në nenin që lidhet me ofrimin e shërbimeve që nuk përmbushin kërkesat e sigurisë.

Gjatë dimrit, Liqeni Baikal është një destinacion i njohur turistik, ku organizohen ekskursione dhe udhëtime me automjete mbi akull. Megjithatë, ekspertët paralajmërojnë se trashësia e akullit mund të ndryshojë ndjeshëm për shkak të erërave, rrymave dhe luhatjeve të temperaturës, duke rritur rrezikun për vizitorët.